Titulli: RID Hub për frymëzimin e të rinjve e fuqizimin e komunitetit dibran
Përshkrimi i aktivitetit: Krijimi i RID Hub-it[1] (Rikthim dhe integrim në Dibër), si nyje ku të rinjtë dibranë, përmes iniciativave socio-kulturore e dialoguese, promovojnë rrëfime suksesi të migracionit e rikthimit. Përmes historive të emigrantëve të rikthyer që kanë shfrytëzuar potencialet e Dibrës për të ngritur biznese të suksesshme në sektorë si: turizmi, bujqësia dhe artizanati, RID-i do të frymëzojë të rinjtë për të krijuar modele lokale të zhvillimit dhe sipërmarrjes përmes aktiviteteve fizike dhe virtuale që ndërthurin traditën me modernen, aktivizojnë Këshillin Rinor Vendor dhe shkollat e nxisin pjesëmarrjen komunitare dhe ndërgjegjësimin mbi mundësitë reale brenda vendit.
Qëllimi: Q1: Krijimi i RID Hub-it për frymëzimin e të rinjve dhe fuqizimin e komunitetit dibran përmes njohjes me histori suksesi të emigrantëve të rikthyer. Q2: Promovimi i mundësive ekzistuese të Dibrës si një alternativë me shumë potencial ndaj migracionit të parregullt.
Përshkrimi i aktivitetit:
- Takim me Këshillin Rinor Vendor e gjimnazet e Dibrës për përfshirjen e të rinjve në RID.
- Ndërtimi i platformës digjitale RID (medie sociale) nga të rinjtë RID.
- Mbledhja dhe dokumentimi i historive të rikthimit për të përzgjedhur histori suksesi.
- Takime/aktivitete socio-kulturore për nxitjen e dialogut, ndërgjegjësimin dhe pjesëmarrjen aktive të komunitetit lokal dhe rinisë në punëtori komunitare (p.sh., në një nga bujtinat e ngritura nga të rinj të rikthyer për të diskutuar arsyet e migrimit, sfidat dhe alternativat lokale edhe në bashki të vogla).
- Fushatë digjitale ndërgjegjësimi përmes platformës RID (fact sheet-e, poster-a, reels-a,) për njohjen e mundësive lokale, modeleve të suksesit, si dhe vjeljen e mendimeve e sugjerimeve nga përdoruesit dhe pjesëmarrësit.
Lidhja me migracionin: Projekti lidhet drejtpërdrejt me migracionin, pasi fokusohet tek emigrantët e rikthyer dhe se si ata kanë shfrytëzuar përvojën, kursimet dhe idetë e tyre për të hapur biznese në vendlindje. Historitë e tyre tregojnë ndikimin pozitiv që rikthimi mund të kenë për zhvillimin lokal dhe frymëzimin e të rinjtë jo vetëm për të parë mundësi brenda vendit, por dhe për t’u bërë promotorë të zhvillimit të tij.
Përfitimet për komunitetin: Rrit ndërgjegjësimin e të rinjve mbi alternativat lokale ndaj migracionit të parregullt; Forcon pjesëmarrjen e Këshillit Rinor Vendor dhe shkollave në iniciativa rinore komunitare; Promovon imazhin pozitiv të emigrantëve të rikthyer si aktorë zhvillimi në komunitet; Ndihmon në krijimin e një kulture të re të sipërmarrjes dhe vetëpunësimit në zonë.
Koha e zbatimit: Zbatimi i plotë i RID Hub kërkon një periudhë prej 6 muajsh, e ndarë në faza si më poshtë:
Muajt 1-2: Planifikimi, krijimi i ekipit me të rinj, zhvillimi I RID Hub dhe platformës digjitale RID.
Muajt 3-4: Mbledhja dhe dokumentimi i historive të rikthimit
Muajt 5-6: Fillimi i takimeve/aktiviteteve komunitare dhe fushatës digjitale.
[1] Akronimi i platformës, përveç se ësht menduar i thjeshtë për t’u mbajtur mend dhe përfaqësues në ide, është edhe një lojë fjalësh me fjalën në anglishte ‘rid’ si për të përcjellë mesazhin e adresimit të problemit për ta çrrënjosur apo minimizuar.
