Qendra “Pathways to Opportunity and Equality Center” (POEC) ka zbatuar për nëntë muaj projektin “Afrimi i të rinjve me librin dhe promovimi i kulturës letrare”, mbështetur nga Ministria e Turizmit, Kulturës dhe Sportit. Ky projekt kishte në fokus rritjen e interesit të nxënësve për leximin, afrimin e tyre me autorët letrarë, si dhe krijimin e një klime më të gjallë kulturore në shkollat e qarkut Dibër. Gjatë kësaj periudhe u zhvilluan një sërë takimesh në shkolla të ndryshme, me pjesëmarrjen e shkrimtarëve, profesorëve të letërsisë dhe ekspertëve të fushës, të cilët nxitën debat dhe reflektim mbi rëndësinë e leximit. Në një kohë kur shoqëria përballet me sfidat që vijnë nga inteligjenca artificiale dhe zhvillimet e shpejta teknologjike, ruajtja dhe forcimi i aftësive krijuese mbetet një domosdoshmëri për gjeneratat e reja. Pikërisht këtë dimension e theksuan edhe ekspertët e letërsisë gjatë takimeve, duke e parë leximin si mjetin më të fuqishëm për të ushqyer mendimin kritik, imagjinatën dhe identitetin kulturor të të rinjve. “Lufta është me inteligjencën artificiale, por truri i njeriut mbetet shumë më i sofistikuar,” theksuan ekspertët gjatë bisedës me nxënësit, duke nënvizuar rëndësinë e leximit dhe mendimit kritik në epokën e teknologjisë. Prof. Armela Panajoti ndau reflektime mbi mundësitë që sjell teknologjia moderne, por edhe sfidat që ajo paraqet për krijimtarinë e brezit të ri.
Gjithashtu, si një simbolikë mbi rëndësinë e librit, prof. Shpëtim Cami ndau kopje të librave të tij, duke pasuruar bibliotekat lokale të shkollave dhe duke i lënë nxënësve një trashëgimi të prekshme për të vazhduar rrugën e leximit.
Shupenzë – Shkolla “Ibrahim Daci”
Turi nisi në Shupenzë, ku nxënësit e shkollës “Ibrahim Daci” treguan pasion të jashtëzakonshëm për librin, duke prezantuar dhjetëra vepra të lexuara gjatë vitit shkollor. Takimi u shoqërua me diskutime mbi fuqinë e letërsisë dhe ndikimin që ka leximi në zhvillimin e mendimit kritik. Mes titujve të përmendur nga nxënësit ishin “Meri Ylli”, “Shpella e Piratëve” dhe “Rreth Botës për 80 Ditë”, duke dëshmuar etjen për një bibliotekë më të pasur dhe më të larmishme në shkollë.
Klos – Shkolla “Tahir Hoxha”
Ndalesa e dytë ishte në Klos, ku u krijua një atmosferë e veçantë letrare. U evidentuan nxënës që kishin lexuar me dhjetra libra gjatë vitit shkollor, ndërsa mësuesit e letërsisë vlerësuan përkushtimin e tyre. Shkrimtarë dhe ekspertë të letërsisë zhvilluan diskutime mbi autorë kombëtarë, shkrimtarë shqiptarë të përkthyer në gjuhë të huaja, si dhe autorë botërorë me ndikim të madh.
Burrel – Shkolla “31 Korriku”
Në Burrel, takimi u përqendrua te mundësitë për të mbështetur nxënësit me prirje krijuese, duke nxitur krijimin e një Klubi të Librit në shkollë. Kjo nismë synon të bëhet një hap konkret për ndërtimin e një mjedisi më të gjallë kulturor, ku leximi të shoqërohet me aktivitete kolektive.
Dibër – Shkolla “Nazmi Rushiti”
Një moment i veçantë ishte takimi në shkollën “Nazmi Rushiti” në Dibër, ku Prof. Shpëtimi dhuroi librin e tij më të fundit për bibliotekën e shkollës. Ai u shpreh se Dibra ka qenë frymëzim për veprat e tij dhe ftoi nxënësit të kthejnë sytë nga vendlindja si burim identiteti dhe krijimtarie. Profesori i inkurajoi të rinjtë që, përmes leximit dhe shkrimit, të zhvillojnë mendimin kritik dhe të mos ndalen së krijuari.
Projekti i POEC jo vetëm që afroi nxënësit me librin, por edhe krijoi ura bashkëpunimi mes tyre, autorëve dhe mësuesve, duke e kthyer leximin në një përvojë frymëzuese. Në fund, u përzgjodhen punimet më të mira të nxënësve pjesëmarrës, si një tregues i potencialit krijues të të rinjve të Dibrës.
